Ein "Machwerk" von Hubert dem Heimatdichter

Das folgende „Machwerk“ (laut Schuchmann) habe ich zu einer Klassenfeier verfasst. 

Hubert

Was mer sou alles mitmacht.

Jeden Moje um ¾ siwwe,
wann ich sou gärn wer noch leije gebliwwe,
rabbeld de Wegger, un gar net vun weit
rift’s doich die Dierspalde: Hubert ‘s is Zeit!
Och es is zum Steinerweiche,
do hilft ko Schenne un ko Kreische,
demm Schicksal is net auszuweische.
Netwahr! Gell! Ihr mißt verstehn,
sou konn des net weidergehn!

Ich muß mich halt dozu zwinge
aus moim warme Bett zu springe,
kemme, wesche, Mappe dabbe
un naus in die Schul zu schlabbe.
Doch es is wie abgemacht,
jedesmol eh ich’s gedacht,
is es glei ¾ acht.
Also! Netwahr! Gell! Ihr mißt verstehn,
des konn sou net weidergehn!

Ich bin halt a bei denne Dumme,
die net nur mondachs späder kumme!
Un donn werd mer zomme g’staucht,
daß om long de Kopp noch raucht.
Och es is zum Kinnerkrije
ich wer halt immer ogeschrije
ded ich doch dehom noch lije!
Netwahr! Gell! Ihr mißt verstehn,
sou konn des net weidergehn!

Mondachmoje erste Stunde
Gähne noch in aller Munde,
unn mer hört’s bei alle Herrn:
es will a garnet Sundach wern!
Och wer ich nor dehom gebliewe,
denn es werd bloß sou zum üwe
widder mol a Arweit g’schriewe!
Netwahr! Gell! Ihr mißt verstehn,
sou konn des net weidergehn!

Man hat deshalb mit Bedacht,
die zweite Stunde angebracht,
denn die Staatenbürgerstunde
is für uns ne Schläferstunde.
Doch ob mer hinne pennt versteckt,
die Nas in annern Bücher steckt
immer werd mer uffgeschreckt!
Netwahr! Gell! Ihr mißt verstehn,
sou konn des net weidergehn!

Dritt Stund Englisch, anoch dess,
unn dezu noch denn Macbeth.
Domit kimmt mer garnet weit,
wonn mer denn net vorbereit;
Konn mer iwwersetze mo,
kimmt mer b’stimmt beim Läse dro.
Is es awer umgekehrt,
is es gonz b’stimmt a nix Wert!
Netwahr! Gell! Ihr mißt verstehn,
sou konn des net weidergehn!

Endlich is es großi Paus,
unn mer konn in’s Freie naus.
Wie ich awwer en Schnaiball mach,
schläicht de Steinert widder Krach:
Herd mer uff mit denne Bosse,
de Chef un ich - mer hawwe b’schlosse,
ab jetzt do werd dess soin gelosse.
Netwahr! Gell! Ihr mißt verstehn,
sou konn des net weidergehn!

In de Relistund dodruff
helle sich die Miene uff,
denn mancher demm die net gefällt
der hot sich ofach abgemeldt.
Unn jeder der dess sou gemacht
hot seither drunne in 08
die Stund beim Kaddespiel verbracht.
Also netwahr! Gell! Ich moin,
dess - dess kennt noch mäi sou soin!!